خلى الدقيقة تفرق
ايه الفرق بين ....
Quality time جودة الوقت اللي بأقضيه مع ابني
و
Quantity of timeكمية الوقت اللي باقضيه مع ابني؟
سؤال مهم لازم نقف عنده شوية
(س) أب مكافح بيقضي أغلب وقته في شغله و بيرجع بيته يقعد مع بنته و زوجته في غرفة المعيشة حوالي ٣ ساعات ، في ال ١٨٠ دقيقة دول البنت بتلعب باللعب بتاعتها، الأم بتتصفح فيسبوك ، و هو بيتفرج على الماتش و بعده بيقلب في بقية القنوات
الأب ده قعد مع أسرته ١٨٠ دقيقة
(ص) أب مكافح برضه بيقضي أغلب وقته في شغله و بيرجع بيته يقعد مع ابنه و زوجته في غرفة المعيشة لكن وقته أقل حوالي ساعة و نص ساعة و بيدخل ينام من التعب ، ال ٩٠ دقيقة دول بيقضوهم سوا ما بين لعب و تلوين و أغاني و زغزغة و قصص و شوية جمباز و وقفة صلاة
الأب ده قعد مع أسرته ٩٠ دقيقة
تفتكروا مين فيهم قعد مع أسرته وقت أكتر؟ مين شحن بطارية البيت كله طاقة و حب و ترابط و احساس بالأمان لإبنه او بنته؟
ماما و بابا.....
مهم اوي نركز على قيمة الوقت اللي بنقضيه مع ولادنا.... مش كميته
و مننساش ان أهمية الوقت اللي بنقضيه معاهم ميقلش عن الوقت اللي بنقضيه في حاجات بنعملها برضه عشانهم زي الشغل و الطبخ و المواعين و شغل البيت
مهم اوي اني مهما كنت مضغوط/ة أو مهموم/ة في شغلي و واجبات بيتي اني ادخل البيت استخبى في حضن ولادي و أغرق في العالم الصغير بتاعهم و آخد غطس جوة دماغهم و افكر بعقلهم عشان أفهمهم
أشبع من الكنيسة الصغيرة اللي في بيتي و أستمتع بالدفا الموجود فيها
تعالوا نركز الفترة اللي جاية على قيمة الوقت مش كميته
