انترفيو الحضانة
مساء الخير يا فندم احنا حضانة ..... بنتصل بحضرتك لتحديد ميعاد انترفيو مع مديرة الحضانة عشان ابنك/ بنتك
اتصال بينتظره أولياء أمور كتير و تبدأ بعده علامات الاستفهام في الظهور في مخ الأم/ الأب :
ياترى هيسألوه في الألوان و الأشكال و أجزاء جسمه؟
يا ترى نلبس ايه؟ كاجوال و لا فورمال؟
يا رب يقعد دقيقتين من غير ما يكسر حاجة و لا يمشي على الحيط !!
طب اديله الموبايل عشان يسكت و لا هيقولوا كدة غلط؟
في البوست ده هنتكلم عن انترفيو الحضانة و ايه الهدف منه...
١- تهيئة الطفل للإنترفيو: افهمه هو رايح فين و امتى و ده يتم بحكمة .. لا أخوفه من المقابلة.. و لا أقول له هسيبك لوحدك في الحضانة... و لا احط عليه عبىء نفسي كأنه رايح كشف طبي للتجنيد🧑✈️👩✈️
٢- هدف الانترفيو : لازم أنا كولي أمر أعرف الهدف من انترفيو (المقابلة الشخصية) فالهدف من انترفيو الحضانة ان الحضانة تتأكد من بعض أمور زي:
+ان الطفل يكون نموه الجسدي و النفسي و العقلي و المعرفي و اللغوي و الحركي طبيعي .. و لو فيه مشكلة هل عندي متخصص في ده و لا دي مش امكانيات حضانتي و الطفل ده محتاج توجيه ؟
+ان الاب و الام عندهم اي درجة من درجات الوعي التربوي او عندهم استعداد يتعلموا ده و عندهم استعداد للتواصل مع الحضانة عشان نوصل لأفضل نتايج ممكنه مع الطفل
٣- من حقي كولي امر في الانترفيو أسأل أنا كمان كل الأسئلة اللي تخليني مطمن على ابني / بنتي في المكان ده .. المنهج التربوي و المهاري.. سياسة تقويم سلوك الطفل في الحضانة.. المواعيد.. الحفلات الرحلات و الأنشطة. سياسة النظافة و التعقيم في الحضانة .. لغاية ما اطمن انه ده مكان مؤتمن و طبعاً في الغالب بأكون عارف معلومات عن الحضانة قبل ما اقدم فيها من حد جربها أثق في رأيه مش بسأل بشكل عشوائي على الإنترنت: " يا جماعة ايه رأيكم في حضانة كذا ؟" لأني طبعاً هتشتت اكتر من تباين آراء الناس
٤- من حق الحضانة كمان تسأل عن بعض أمور متعلقة بطريقة تربيتك لإبنك و السياسة اللي بتتبعها لتغيير سلوكه و كمان تفاصيل عن صحة ابنك و سلوكه و كل ما يخصه كشريك جديد في تربية ابنك و من الأمانة انك ترد عن كل الأسئلة دي بكل شفافية
٥- في الانترفيو ارجوك متضغطش على ابنك يسلم او يرد او تقول له يللا يا حبيبي اتشقلب عشان تعجب المديرة... هي المفروض بخبرتها هتعمل ده و هتعرف المعلومات اللي عاوزاها حتى من غير ما يتكلم و هتفهم طريقة تربيتك لإبنك و أولوياتك في التربية من خلال المقابلة بدون ما تضغط عليه فأرجوك متضغطش على إبنك/بنتك انه يرد او يقول اللي حافظه لأن انطباع الطفل عن المكان هيكون ده المكان اللي ضغطوا علي فيه ،و احنا بنحاول نقلل الحاجز النفسي ناحية الحضانة كمكان جديد للطفل
طيب خلينا إجمالاً نلخص ليه ممكن طفل يترفض في انترفيو الحضانة:
١- لما تستشعر الادارة ان ولي الأمر مش هيكون متعاون في تربية إبنه او انه سبب تأخر تطور إبنه سواء بسبب إهمال/استسهال او بسبب حماية زايدة/حرص مبالغ فيه
٢- لو الطفل مدلل بزيادة و كل طلباته مجابة لدرجة انه مش بيصبر او يقبل فكرة: لأ مش هنعمل ده دلوقت، و لو ولي الأمر مش عاوز يعدل من تدليله الزايد لطفله
٣- لو الطفل متأخر عن مؤشرات نموه الطبيعية في سنه و ده يندرج تحته حاجات كتير طبعاً و الحضانة لو مفيهاش دمج او اخصائيين مؤهلين للتعامل مع التأخر او مدرسين ظل shadow teachers يبقى مش أفضل حاجة قبول الطفل الا في حضانة ده تخصصها.
٤- لو الطفل بيقرص.. يعض.. يخربش.. يؤذي لأنه هيتعب بقية الأطفال و هنا احياناً يمكن قبول الطفل بشرط التعاون و لفترة زمنية محدودة و بنتابع تطور تعديل السلوكيات العنيفة دي و هل بتتحسن بأي درجة و لا لأ.
