استقلالية الطفل
تعتبر فترة الطفولة المبكرة فترة حاسمة في تطور الطفل، ومن أهم الجوانب اللي حابين نركز عليها في المقال ده هي تنمية استقلالية الطفل...
كتير من الأمهات بيكونوا في صراع يومي بين نضافة البيت و ملابس الأولاد و بين انهم يسيبوا ولادهم ياكلوا بنفسهم ، أو يغسلوا ايديهم و وشهم بنفسهم او يلمُّوا ألعابهم بنفسهم بعد ما يخلَّصوا لعب ...
فيه قاعدة ذهبية تربوية بتقول:
"اللي الطفل بيقدر يعمله .. انا مش باعمله"
بمعنى: إن لو الطفل في سن معين يقدر ياكل لوحده حتى لو مش متمكن قوي، أنا ك ماما مش بأكله مثلاً.
حتى لو هيحصل بعض الفوضى او هيبهدل هدومه، لأن وقتها... تعليمه الاستقلال و الإعتماد على نفسه أهم من الحفاظ على النظافة اللي بالتأكيد أقدر أعملها في وقت لاحق.
ليه بيعتبر استقلال الطفل في مرحلة الطفولة المبكرة مهم جداً !
1. تعزيز الثقة بالنفس:
لمّا يتعلم الطفل ازاي يقوم بمهام بسيطة لوحده، بيزيد شعوره بالثقة بنفسه وقدرته على تحقيق الأهداف.
2. تنمية المهارات الحياتية:
يكتسب الطفل مهارات مهمة زي: التنظيم والتخطيط والمسؤولية من خلال عمل أنشطته لوحده.
3. تعزيز الاستقلالية العاطفية:
يتعلم الطفل ازاي يتعامل مع مشاعره السلبية والإيجابية من خلال نجاحه و فشله في تحقيق المهام ، و يحاول تاني و ينجح و هكذا
ده بيجعله أكثر قدرة على التأقلم مع التحديات في الحياة.
4. تعزيز الاستقلالية في التعلم:
الطفل بيكون أكتر قدرة على استيعاب المفاهيم الجديدة واكتساب المعرفة لما يتمكن من استكشاف العالم حواليه بنفسه.
مع بعض كشركاء في التربيه محتاجين نشتغل على تشجيع استقلالية الأطفال في سنوات الطفولة المبكرة، لأنها بتمهد الطريق لتنمية شخصيات قوية ومستقلة في المستقبل.
ربنا يدينا نعمه و حكمه اننا نربي ولاده حسب إرادته الصالحة .
