المقالات

في المقال اللي فات #متفرحوش(١) اتكلمنا عن أضرار استخدام الموبايلات و الشاشات المضيئة بجميع أنواعها و تأثيره السيء على اولادنا جسديا" و سلوكيا"

النهاردة جايين و جايبين معانا أفكار لتنمية مهارات طفلك بأبسط الطرق و منها : 

+أقلام شمع و ورق أبيض كبير بيسموه في المكتبات "فرخ ورق درافت أبيض" بيبقى عبارة عن ١ متر * ٧٠ سم يتلصق في مكان معين في البيت... المكان ميتغيرش لكن الورقة تتغير و نتفق ان هو ده مكان الشخبطة بس ، و يرسم و يلون و يشخبط براحته خالص و نعلق ابداعاته على الحيط و نوريها لكل الضيوف و تيتة و جدو و الاهل و الأقارب و الاحباب و نصفق كلنا و نشجعه و نشكره على زيارة معرض الفن السريالي للفنان الصغير بتاعنا

"الهدف: تعزيز خيال الطفل، تنمية قدرته على الابداع، تعزيز ثقته بنفسه، شعور إيجابي برضا الكبار عنه"

+نشغل الاغاني التعليمية أو اللي تحتوي على أهداف تربوية أو الترانيم التعليمية على الموبايل و نحطه على رف عالي في المكتبة أو غيره بحيث يسمع صوتها مش يتفرج عليها و يردد معاها طول اليوم أو نعمل معاه حركات تعبر ان الكلام اللي بيسمعه "ننام لما تيجي كلمة ينام.... نطلع لفوق و نشاور على فوق لما تيجي كلمة فوق.... ننزل على ركبنا لما تيجي كلمة تحت...

النوع ده من النشاط مهم جدا" للطفل و احسن مليون مرة من مشاهدته لأي تليفزيون أو تابلت 

و موبايل

"الهدف: تنمية خيال الطفل ، تمارين رياضية ، التعلم عن طريق الحفظ و التكرار، مهارات لغوية، قضاء وقت قيم مع الوالدين" 

+حواديت أبلة فضيلة اللي كنا بنسمعها زمان في الراديو ، موجودة على الإنترنت نقدر نشغلها -صوت فقط- للطفل يسمعها ، أو بعض الحكايات الأخرى من الكتاب المقدس و التي بتقدمها قناة كوجي للأطفال ، "سماع" الحواديت بينمي قدرة الطفل على التخيل و الإبداع و بيشَكّل جزء كبير من النمو العقلي للطفل

بنفكر حضراتكم بمراجعة القصة قبل عرضها على الطفل عشان نتأكد انها مناسبه له و للقيم اللي بنعلمها له كمان و بعدها نقدر نحكيها له أو نعرضها له صوت فقط قبل ما ينام على السرير

"الهدف: تنمية التخيل و الإبداع و ابتكار الصور ، تنمية القدرات اللغوية، تعزيز الشعور بالأمان، تعلم القيم و المبادىء الحياتية مثل 

الشكر .. الصدق.. الأمانة" 

+عجينة الملح و دي بتكون عبارة عن عجينة آمنة للطفل زي الصلصال لكن آمن جدا" و طريقتها سهلة جدا" عبارة عن كوب دقيق كوب ملح و بعض الماء و تخلط ببعضها البعض و يضاف عليها ألوان طعام ... احمر ازرق اخضر أي لون، هتنبهروا من قدرة الطفل على التشكيل... نجمة ،دايرة، عربية، شمعة، الإبداع ملهوش حدود و هتقضوا وقت حلو اوي

بنفكر حضراتكم طبعا" انه العجينة دي للعب بس مش للأكل إطلاقا" لكن لا قدر الله لو طفل اكل قطعة صغيرة بالغلط بدون رقابة، ميجرالهوش حاجة لأن مكوناتها من المطبخ

"الهدف: تنمية الاعصاب و العضلات الطرفية و التمهيد للكتابة، خلق وقت قيم بين الطفل و والديه، تنمية الحصيلة اللغوية، اطلاق قدراته الابداعية في التشكيل " 

+المساعدة في الاعمال المنزلية البسيطة: نعمل اكل سهل سوا زي جيلي... سلطة فواكه و يقطع بشوكة بلاستيك .... سلطة خضار.... نعجن بسكويت .. ننضف مكاننا و نساعد ماما في جمع الألعاب بتاعتنا، ننشر الغسيل سوا "مهم جدا" تمرين المشابك لتنمية اعصابه الطرفية" ، نلم الغسيل "خصوصا" الشرابات" "مهم جدا" لإيجاد العلاقات بين الاشكال و الفرز و التصنيف" و تطبيق الهدوم لتعزيز الثقة بالنفس و انه بيعمل دوره في البيت و بيسند له مهام بيقدر ينفذها" !

"الهدف: الأنشطة دي تبدو بسيط لكن لها اكتر من فايدة مهارية و سلوكية و كمان نفسية فيها الطفل بيعرف مسئوليته ناحية بيته و انتماؤه له و بينمي ثقته بنفسه لأنك بتشجعه كل ما يعمل حاجة صغيرة و كمان بيتعرف على أسماء الأشياء زي الأدوات و الملابس و غيرها

+الطباعة: بإستخدام ورق الاستنسل أو فايل بلاستيك قديم يقدر الوالدين يصمموا أي شكل و يفرغوه "مركب، نجمة، كورة" و باستخدام اسفنجة صغيرة بيقوم الطفل بوضعها في طبق مسطح به ألوان مائية و يطبع على ورقة بيضاء الشكل الموجود 

أو بنفس الفكر طباعة كف يده باستخدام ألوان المياه على ورقة بيضاء 

"الهدف: مهارة الطباعة بتعلم الطفل الدقة و مع الوقت و التكرار هيتعلم يتقن العمل ده اكتر و اكتر، خلق نوع من الفوضى المنظمة أو الفوضى الخلاقة هو بيبقى مبسوط و ايده مليانة ألوان و هيعرف ان النشاط ده بنعمله سوا في مكان معين و وقت معين"

+ألعاب تنمية المهارات ، دلوقتي أصبحت منتشرة بشكل كبير و بأسعار مش عالية ألعاب بسيطة تنمي قدرات و مواهب الطفل زي الفك و التركيب و التآزر و لضم الخرز... ألعاب الذاكرة و المكعبات و العلاقات... و تمييز الأصوات و اسماء الألوان و الحروف و الأرقام

+فيه أنشطة كتييييرة جدا" موجودة على الإنترنت ينصح بعمل بحث بالانجليزية على جوجل و بكتابة سن الطفل هتلاقي انشطة باستخدام خامات البيئة و سهل جدا" أي ماما تعملها في البيت باستخدام خامات بسيطة بدون اي تكلفة إضافية 

+الأطفال الأكبر سنا" نقدر نطبع لهم ورق توصيل و تنمية مهارات أعلى شوية زي توصيل الحروف و العلاقات و الشكل و ضله و مهارات اكتر و اكتر بنلاقيها من خلال بحث بسيط على الأنترنت باستخدام جوجل و يفضل باللغة الانجليزية مثال: 

Dot to dot age 3-5

Tracing for preschool 

Free Colouring sheets 

Free skills sheets

بابا و ماما....

هدفنا نقضي وقت أكبر مع ولادنا و احنا و هم مستمعين ، و بدل ما نقضي الوقت كله نقول ... بس... هس... بتعمل دوشة.... بطل ضرب.... كفاية تخريب.... مينفعش تعمل كدة.... خد الموبايل ده عشان تسكت....

الأفضل اننا نملئ لإبننا/بنتنا وقتهم في حاجات مفيدة تبني لهم مهاراتهم و شخصياتهم و علاقتهم معانا و مع اللي حواليهم

 البدايل كتير جدا"... و ولادنا يستاهلوا نبتكر طرق 

مختلفة لتنمية مهاراتهم

اخيرا": حابين نفكركم.... 

+ #متفرحوش باستخدام الموبايل و التابلت و الكمبيوتر لأنه مش علامة من علامات نمو مهارات الطفل العقلية أو الحياتية بأي صورة من الصور بالعكس 

+تعلُّم الطفل للألوان و الاشكال و الحروف و الأرقام و مهارات الفك و التركيب و إدراك العلاقات و المعكوسات و غيره و غيره من المهارات عن طريق ألعاب الموبايل أو التليفزيون

عامل بالظبط زي لما يكون ابني عطشان و انا بقدم له مياه غازية بكل أضرارها عشان يرتوي...... النتيجة هتكون انه هيرتوي بشكل مؤقت لكن هيعطش تاني بس بعد ما اكون قدمت له كل أضرار المياه الغازية